Molari i tretë dhe shëndeti periodontal

Rezultatet e një kërkimi të Poliklinikës Gemelli

Më shumë se pesëdhjetë vjet më parë në Shtetet e Bashkuara është fokusuar vëmendja te lidhja ndërmjet molarëve të tretë mandibularë dhe shenjave të patologjisë periodontale në ngarkesë të molarit të dytë që ndodhet ngjitur; edhe sot kjo temë paraqet një motiv të fortë për debat në literaturë, ku janë kërkuar studime me teknika të standardizuara dhe analiza mbi një numër të madh individësh.

Nevojitet që t'i kushtohet shumë kujdes, sepse patologjia periodontale në gjendje të avancuar mund të çojë në ekstraktimin e dhëmbit dhe molari i dytë është një nga dhëmbët që ekstraktohen më shpesh për shkak të infeksionit periodontal.

Tipologjia e kërkimit dhe modaliteti i analizës
Kërkimi italian "influence of mandibular third molar surgical extraction on the periodontal status of the adjacent second molars" - të zhvilluar në UOC në sektorin e Kirurgjisë orale dhe implantologjisë në Poliklinikën Gemelli në Romë të drejtuar nga prof.. Antonio D'Addona, të kryer nga dr. Pier Carmine Passareli është publikuar në Journal of Periodontology në mars, revista zyrtare e American Academy of Periodontology.

Objektivat e studimit kanë qenë:
• vlerësimi i efekteve të ekstraktimit kirurgjikal të molarit të tretë mandibular në statusin periodontal të molarit të dytë ngjitur;
• identifikimi i ko-faktorëve që mund të influencojnë shërimin periodontal të molarit të dytë dhe veçanërisht të kalimit nga patologjia në gjendje të shëndetshme;
• përcaktimi nëse periodontiti i lokalizuar në molarin e dytë është një indikacion i vlefshëm për ekstraktimin e molarit të tretë dhe si të kryhet vlerësimi për këtë.

Studimi është kryer në 89 pacientë, 48 gra dhe 41 burra, me moshë mesatare 35 vjeç dhe vetëm 16% ishin duhanpirës. Përpara operacionit janë vlerësuar OPT për të regjistruar pozicionin e molarëve të tretë në bazë të klasifikimeve të Pell and Gregory dhe të Winter.

Ekstraksionet kirurgjikale janë kryer nëpërmjet një protokolli unik dhe nga një profesionist unik, ashtu si edhe është kërkuar nga studimet e mëparshme në literaturë.

Parametrat periodontalë të regjistruar në fillim, ditën e ekstraktimit përpara kryerjes së ndërhyrjes dhe në një follow up prej 6 muajsh kanë qenë: thellësia e xhepit periodontal gjatë sondimit (PPD), recesioni gingival (REC), niveli i atashmentit klinik (CAL), gjakrrjedhja gjatë sondimit (BOP), indeksi i pllakës (PI), indeksi gingival (GI).

Rezultate
Duke analizuar të dhënat kryesore të nxjerra nga një analizë e kujdesshme statistikore, është evidentuar një përmirësim i konsiderueshëm i vlerave të PPD në pjesët distale të molarit të dytë me një fitim mesatar prej 2,1 dhe 2,2 milimetra, me kalimin nga 5,2 dhe 5,4 mm me vlera 3,1 dhe 3,2 mm, për efektin e shërimit spontan periodontal pas heqjes së molarit të tretë; në të njëjtën mënyrë edhe CAL ka pasur një fitim statistikisht të rëndësishëm të 1,9 dhe 2 mm.

Edhe analiza e vlerave të BOP, PI dhe GI ka treguar një përmirësim të rëndësishëm për gjashtë muaj. Një PPD e lartë në fillim ka rezultuar një faktor influencues për një fitim më të madh; veçanërisht, molarët që i përkisnin klasave 3b të Pell and Gregory dhe atyre horizontale të Winter kishin vlera të PPD fillestare më të larta në krahasim me të tjerat; këto diferenca janë shfaqur për gjashtë muaj për shkak të shërimit periodontal.

Për të studiuar kalimin nga gjendja patologjike në atë të shëndetit janë analizuar në mënyrë të ndarë 72 molarë të dytë me një PPD fillestare >4 mm: 73,6% rezultonin të shëruar pas 6 muajsh nga ekstraksioni i molarit të tretë; veçanërisht 22% ka fituar më shumë se 50% të thellësisë së sondimit fillestar, duke kaluar nga vlerat mesatare 6,8 në 2,7 mm.

Individët e rinj dhe të prekur nga periodontiti i lokalizuar në pjesën distale të molarit të 2 janë ata që përfitojnë më së shumti nga ekstraksioni i molarit të tretë, duke ruajtur shëndetin e një dhëmbi thelbësor për mastikacionin.

Përmirësimi i BOP, PI dhe GI për 6 muaj është ndoshta për shkak të rifitimit të një higjiene efikase në shtëpi të favorizuar nga mungesa e dhëmbit distal në pjesën e studiuar.

Konkluzione
Ekstraksioni i molarit të tretë për parandalimin e sëmundjes periodontale të avancuar në ngarkim të molarit të dytë (ndërmjet dhëmbëve më të ekstraktuar për shkak të patologjisë periodontale) duhet të merret në konsideratë; veçanërisht stomatologu duhet të vlerësojë kofaktorët e ekstraksionit parandalues të molarit të tretë, stilet e jetës së pacientit dhe komplikacionet e mundshme që lidhen me ndërhyrjen kirurgjikale.

Për më tepër:
Passarelli PC, Lajolo C, Pasquantonio G, D'Amato G, Docimo R, Verdugo F, D'Addona A. Influence of mandibular third molar surgical extraction on the periodontal status of the adjacent second molars. J Periodontol 2019 Mar 2. [Epub ahead of print]

Përktheu: Valbona Spahia