Saktësia e cone-beam në llogaritjen e humbjes së kockës alveolare në periodontologji

Nga Lara Figini

Matja e kockës së mbetur alveolare përpara trajtimit periodontal është një hap thelbësor për të pasur informacione mbi indet e forta, për të vendosur nevojën dhe formulimin e planeve të trajtimit dhe për të parashikuar prognozën e periodontitit.

Matjet klinike që përdoren zakonisht për diagnozën e periodontitit janë niveli i atashmentit klinik (CAL) dhe thellësia e sondimit të xhepave (PPD).

Sondimi periodontal manual ndonjëherë mund të shkaktojë shqetësime te pacientët, prandaj literatura mbështet një sasi të larmishme studimesh me qëllim që të identifikojë një mënyrë më të rehatshme dhe më të thjeshtë për të ndihmuar ose promovuar matjen e humbjes kockore.

Tomografia e kompjuterizuar me rrezatim në formë koni (CBCT) mund të jetë një instrument i dobishëm në këtë kuptim. Por a është vërtetë efikase dhe e besueshme për të vlerësuar humbjen e kockës alveolare deri në pikën që të mund të zëvendësojë plotësisht sondimin manual?

Tipologjia e kërkimit dhe modaliteti i analizës
Në një studim të publikuar në Journal of Oral Science në shkurt 2019 është vlerësuar saktësia diagnostikuese e tomografisë së kompjuterizuar me rrezatim në formë koni (CBCT) rreth humbjes kockore periodontale.

Në studim janë përfshirë 180 pjesë të dhëmbëve që janë hequr nga 13 pacientë. Niveli i atashmentit klinik (CAL) është matur dhe janë marrë imazhet me CBCT përpara ndërhyrjes periodontale.

Tre periodontologë kanë matur distancën intra-kirurgjikale ndërmjet bashkimit smalt-cement dhe kreshtën kockore alveolare në pjesët mezio-bukale, bukale, disto-bukale, mezio-linguale/palatale, linguale/palatale dhe disto-linguale/palatale.

Për të kryer krahasimet ndërmjet masave të marra janë përdorur tre metoda. Përveç kësaj janë analizuar variacionet inter-observuese dhe intra-observuese.

Rezultate
Diferenca statistikisht të rëndësishme janë ndeshur ndërmjet të dhënave të marra me CBCT dhe ato me llogaritjen manuale të CAL+2,04 mm (P= 0,000) dhe ndërmjet të dhënave të CBCT dhe matjeve intra-kirurgjikale (P=0,001).

Të gjitha pjesët kanë treguar diferenca në CBCT në lidhje me matjet intra-kirurgjikale dhe në lidhje me krahasimet CAL+2,04 mm, me përjashtim të pjesëve bukale (P=0,187 dhe 0,147, respektivisht).

Konkluzione
Nga të dhënat e evidentuara nga ky studim, që duhet të konfirmohen me punime të tjera analoge, mund të dalim në përfundimin që rezultatet e CBCT nuk përputhen me ato të matjes intra-kirurgjikale.

Implikime klinike
Qoftë sondimi klinik qoftë imazhet e marra me CBCT kanë pikat e tyre të dobëta intrinsike. Në diagnozën klinike periodontale, CBCT duhet të përdoret me kujdes dhe vetëm nëse nevojitet për të shmangur dozat e rrezatimeve të pajustifikuara për pacientin.

Për më tepër:
Yang J, Li X, Duan D, Bai L, Zhao L, Xu Y. Cone-beam computed tomography performance in measuring periodontal bone loss. J Oral Sci 2019 Feb 26.

Përktheu: Valbona Spahia