Inlay, onlay dhe kurorat. Normat e mbijetesës dhe shkaqet e dështimit për 5 vjet

Nga Lara Figini

Duke qenë se pritshmëritë e jetës janë gjithnjë e më të mëdha në nivel global, popullsia adulte në vendet e zhvilluara priret që të kurohet dhe të ruajë dhëmbët e veta natyrale sa më gjatë të jetë e mundur, duke evituar procedurat ekstraktive dhe duke preferuar ato konservative/rehabilituese.

Ekzistojnë dy lloje restaurimi që zakonisht mund të përdoren për kthimin e një dhëmbi të vetëm:
• restaurimi direkt;
• restaurimi indirekt (inlay, onlay, kurora të plota).

Çdo lloj restaurimi ka indikacionet dhe kundërindikacionet e veta, ashtu si edhe avantazhet dhe disavantazhet. Restaurimet me mbulim të plotë janë përdorur gjerësisht në praktikën klinike të përditshme, veçanërisht kur struktura e dhëmbëve ka pësuar një humbje më të madhe se 50%.

Të gjitha restaurimet në qeramikë janë bërë shumë popullore falë tejdukshmërisë së tyre dhe vetive të larta estetike dhe tashmë shpesh zgjidhen si materiale të zgjedhjes së parë.

Por cila është prognoza e llojeve të ndryshme të restaurimeve të lartpërmendura dhe cilat janë komplikimet më të shpeshta që çojnë në dështim?

Tipologjia e kërkimit dhe modaliteti i analizës
Në një revizion sistematik të publikuar në Journal of Oral Rehabilitation në nëntor 2018 është kërkuar që të identifikohet nëse lloje të ndryshme të restaurimit indirekt të kryer zakonisht për të rehabilituar funksionalisht dhëmbët e veçantë kishin komplikacione të ndryshme biologjike dhe teknike, ashtu si edhe norma të ndryshme mbijetese.

Autorët kanë kryer një kërkim elektronik të të gjithë studimeve të publikuara mbi argumentin ndërmjet viteve 1980 dhe 2017 nëpërmjet Medline të kryer nga 2 revizorë të pavarur. Një kërkim i fundit elektronik është kryer me databazën Scopus dhe Embase përveç një kërkimi manual për të njëjtat periudha kohore. Janë krahasuar inlay, onlay dhe kurorat e plota.

Rezultate
Nga 2849 studime të identifikuara, vetëm 9 janë përfshirë në revizionin përfundimtar. Për fat të keq për shkak të heterogjenitetit të studimeve nuk ka qenë e mundur që të kryhet as një meta-analizë as ndonjë krahasim i rëndësishëm ndërmjet llojit të restaurimit ose materialeve.

Norma mesatare e mbijetesës për 5 vjet e inlay ka rezultuar të jetë 90,89% ndërsa për onlay dhe kurorat 93,50% dhe 95,38%, respektivisht. Analiza statistikore ka treguar që kariesi është komplikacioni biologjik për të gjitha llojet e restaurimeve, të ndjekura nga fraktura e rrënjës dhe/ose e dhëmbit (11,34%) dhe nga motivet endodontike.

Frakturat e qeramikës paraqesin komplikacionin teknik më të zakonshëm, të ndjekur nga humbja e ritencionit dhe nga krisja e porcelanit.

Konkluzione
Të dhënat e nxjerra nga ky revizion duhet të konfirmohen me revizione të tjera analoge dhe janë të nevojshme studime të tjera cilësore mbi këtë argument sepse nga ky punim del se cilësia kompleksive e 9 studimeve të përfshira për fat të keq është e ulët.

Për më tepër:
Vagropoulou GI, Klifopoulou GL, Vlahou SG, Hirayama H, Michalakis K. Complications and survival rates of inlays and onlays vs complete coverage restorations: A systematic review and analysis of studies. J Oral Rehabil 2018 Nov;45(11):903-20.

Përktheu: Valbona Spahia