Si të mbajmë një gjendje të mirë të shëndetit oral gjatë shtatzënisë, për të shmangur pasojat sistemike

Nga Lara Figini

Femrat gjatë shtatzënisë shpesh nuk dinë sesi të sillen në lidhje me problematikat gingivale dhe dentare që lindin në këtë periudhë të veçantë të jetës së tyre, të lidhura paraprakisht me ndryshimet hormonale.
Shpesh ngurrojnë që t'i nënshtrohen kontrolleve stomatologjike për të shmangur trajtimet e bezdisshme për to, të bindura që është më mirë të shmangen radiografitë dhe administrimi i barnave si anestezitë, antibiotikët dhe medikamentet kundër dhimbjes. Në të vërtetë, shtyrja e trajtimeve stomatologjike për pas lindjes nuk rezulton pothuajse kurrë që të jetë zgjedhja më e mirë për shëndetin e pacientes për shkak se më e mira është që të mbahet gjatë shtatzënisë një gjendje optimale e dhëmbëve dhe gingivave, për të shmangur pasojat sistemike.

Patologjitë gingivale në shtatzëni
Ndryshimet hormonale rritin riskun e problemeve gingivale gjatë shtatzënisë për më tepër duke çuar në një ënjtje dhe gjakosje të gingivave. Disa femra mund të zhvillojnë edhe ënjtje të vogla gingivale gjatë shtatzënisë (epilidi i shtatzënisë) që përgjithësisht nuk dhembin, por e bëjnë të vështirë mbajtjen e një higjiene të saktë orale.

Në parim këto ënjtje zhduken spontanisht pas lindjes së foshnjës, por kurdo që do të paraqesin një pengesë serioze në manovrat e higjienës orale në shtëpi është mirë që t'i sugjerohet pacientes që të trajtojë këto ënjtje përpara lindjes.
Është detyrë e stomatologut që të edukojë dhe të motivojë pacientet shtatzëna që të përpiqen pak më shumë në kujdesin e dhëmbëve duke i larë pas çdo vakti kryesor për të paktën 2 minuta me një pastë me bazë fluori dhe duke përdorur të paktën një herë në ditë fillin interdentar ose furçat interdentare.

Erozioni dentar në shtatzëni
Erozioni dentar, që përfaqëson humbjen e shtresës së jashtme të smaltit dentar është një e papritur që shfaqet shpesh në shtatzëni kur dhëmbët e pacientëve janë të ekspozuar vazhdimisht ndaj acidit gastrik për shkak të episodeve të të vjellave që ndonjëherë zgjatin edhe për periudha të gjata.
I takon stomatologut që t'i shpjegojë pacienteve që për të parandaluar erozionin dentar duhet që pas episodeve të të vjellave të shpëlajnë gojën me ujë të përzier me një lugë kafeje bikarbonat natriumi (që është në gjendje të tamponojë acidin gastrik) dhe të mos i lajnë dhëmbët menjëherë në mënyrë që smalti të rimineralizohet. Mirë është që të lahen dhëmbët pas rreth një ore pas episodit të të vjellave.

Radiografitë dhe barnat në shtatzëni
Radiografitë dentare, të kryera sigurisht me kujdes dhe duke përdorur veshje mbrojtëse janë konsideruar në gjendjen aktuale të sigurta gjatë shtatzënisë. Stomatologu mund të përdorë/administrojë anestezi dhe barna si antibiotikët dhe barnat kundër dhimbjes/anti-inflamatore te pacientet shtatzëna nëse nevojiten për të kryer trajtimet dentare (sigurisht, me kujdesin që duhet). Objektivi primar duhet të jetë gjithmonë ai që të ndiqet ose të ruhet shëndeti oral i pacientit.

Konkluzione
Shoqatat më të mëdha kombëtare dhe ndërkombëtare të stomatologëve, gjinekologëve dhe obstetristëve pajtohen në afirmimin që asistenca e shëndetit oral është e sigurt dhe e rëndësishme gjatë shtatzënisë, që duhen motivuar femrat shtatzëna në ruajtjen e një higjiene perfekte orale në shtëpi dhe që duhet t'i nënshtrohen kontrolleve orale të shpeshta nga stomatologu me objektivin kryesor që të arrihet të ruhet shëndeti oral perfekt.

Për më tepër
Anita M. Mark. Dental care during pregnancy. JADA 2018;149(11:1001

Përktheu: Valbona Spahia