Infeksionet e pjesëve të implanteve menjëherë pas operacionit. Kur dhe si kushtëzojnë gjendjen e prognozës së implantit

Nga Lara Figini

Infeksionet post-operatore të implanteve janë konsideruar një komplikacion i rrallë, me një prevalencë që varion nga 1,6% deri në 11,5% dhe zakonisht verifikohen brenda muajit të parë pas pozicionimit të implantit dentar.

Ndryshimet në florën orale të shkaktuara nga antibakterialët sistemikë dhe lokalë të përdorur në periudhën pas operacionit mund të favorizojnë zhvillimin e infeksioneve oportunistike. Ndonjëherë, të tilla komplikacione nuk i përgjigjen pozitivisht terapive antibiotike dhe shpesh vazhdojnë deri sa implanti hiqet.

Si pasojë, infeksionet post-operatore janë sugjeruar si një faktor i rëndësishëm risku për osteointegrimin duke rritur riskun e dështimit të parakohshëm me pothuajse 80 herë.

Tipologjia e kërkimit dhe modaliteti i analizës
Një studim grupi retrospektiv i publikuar në Journal of Periodontology në tetor 2018 është kryer për të përcaktuar faktorë që mund të rritin normën e dështimit tek implantet dentare që kanë zhvilluar një infeksion post-operator gjatë periudhës së osteointegrimit.

Janë analizuar 1322 pacientë të jashtëm (2673 implante) që janë trajtuar në mënyrë konsekutive nga janari 2004 deri në tetor 2015 nëpërmjet programit të diplomimit të specializuar në Kirurgji orale dhe implantologji në Universitetin e Barcelonës. Projekti i studimit ka ndjekur udhëzimet e STROBE për studimet e grupit.

Analiza pre-operatore përfshinte ekzaminime klinike dhe radiografike (me radiografi panoramike ose tomografi të kompjuterizuar). Infeksionet post-operative janë përkufizuar si prania e qelbit ose fistulave në zonën kirurgjikale, me dhimbje ose ënjtje, skuqje dhe rritje të temperaturës, përpara se të vihej proteza.

Një analizë dydimensionale dhe shumëdimensionale e të dhënave duke përdorur regresionin e risqeve proporcionale të Cox është kryer për të zbuluar faktorët prognostikë për dështimin e implantit te pacientët që kanë zhvilluar infeksione.

Rezultate
Prevalenca e infeksioneve post-operatore pas futjes së implantit ka rezultuar të jetë 2,80%. 33 nga 37 pacientë (89,19%) që kanë zhvilluar infeksione janë trajtuar në mënyrë kirurgjikale për shkak të dështimit të terapisë me antibiotikë dhe 65% e implanteve të infektuar janë hequr.

Analiza dydimensionale ka treguar një lidhje të rëndësishme ndërmjet dështimit të implantit dhe llojit të sipërfaqes së qafës (të lëmuar apo të ashpër). Regresioni i risqeve proporcionale të Cox ka zbuluar se qafat me sipërfaqe të ashpër rritin me 2,35 herë mundësinë e dështimit të implanteve.

Konkluzione
Nga të dhënat e nxjerra nga ky studim mund të përfundojmë që pacientët të cilët vuajnë nga një infeksion post-operator pas vendosjes së implantit dentar kanë një prognozë të pafavorshme, me një normë mbijetese të grumbulluar me 33,5%.

Terapia kirurgjikale është e nevojshme për të trajtuar 89% të infeksioneve, sepse terapia me antibiotikë sistemikë rezulton e pamjaftueshme në pjesën më të madhe të rasteve. Implantet me qafë të ashpër ku zhvillohet një infeksion post-operator i parakohshëm duket se janë më të prirur për të pësuar një dështim të parakohshëm të pajisjes.

Implikime klinike
Shfaqja e infeksionit në pjesën e implantit në periudhën menjëherë pas futjes së tij kushtëzon shumë prognozën dhe vetë suksesin, prandaj profesionisti duhet t'i kushtojë të gjithë vëmendjen e mundshme për të shmangur këtë ngjarje.

Për më tepër:
• Camps‐Font O, Figueiredo R, Valmaseda‐Castellón E, Gay‐Escoda C. Postoperative infections after dental implant placement. Implant Dent 2015;24:713-9.
• Nolan R, Kemmoona M, Polyzois I, Claffey N. The influence of prophylactic antibiotic administration on post‐operative morbidity in dental implant surgery. A prospective double blind randomized controlled clinical trial. Clin Oral Implants Res 2014;25:252-9.
• Camps-Font O, Martín-Fatás P, Clé-Ovejero A, Figueiredo R, Gay-Escoda C, Valmaseda-Castellón E. Postoperative infections after dental implant placement: Variables associated with increased risk of failure. J Periodontol 2018 Oct;89(10):1165-73.

Përktheu: Valbona Spahia