Atrofia ekstreme e nofullës, ndërhyrja inovative e implantologjisë

Është kryer një nga ndërhyrjet e para në Itali në implantologjinë e nofullës te një pacient i prekur nga atrofia ekstreme e nofullës, pra me një humbje të kockës.

Bëhet fjalë për një trajtim të padëgjuar më parë në territorin italian, të përshtatur nga doktor Marco Rinaldi, kirurg oral dhe specialist në odonto-stomatologji në Dental Unit në Klinikën Private Villalba në Bologna, në bashkëpunim me Maurice Mommaerts, drejtor i European Face Center dhe profesor në Spitalin Universitar të Brukselit, shpikës i metodikës AMSJI (Additively Manufactured Subperiosteal Jaw Implant) që është kirurgjia implantare e indikuar pikërisht për pacientët me atrofi të nofullës në gjendje të rëndë.

Atrofia e kockës së nofullës është një pasojë e humbjes, traumatike ose fiziologjike, e dhëmbëve me riabsorbim të të gjithë indeve mbështetëse ku ato qëndrojnë. Kjo patologji sjell një paralizë pothuajse totale të kockës së nofullës, që sidoqoftë mbetet e bllokuar, me pasoja të rënda në planin ushqimor, funksional dhe estetik.

"Metodologjia e përdorur është kaq e avancuar dhe precize saqë ndërhyrja në vetvete nuk ka rezultuar veçanërisht e komplikuar dhe është përfunduar në më pak se dy orë" - ka komentuar doktor Rinaldi. "Pacienti nuk kishte dhëmbë dhe paraqiste një shkallë shumë të avancuar të atrofisë kockore të nofullës. Në këto raste nuk ka mundësi që të futen implante normale. Pra kemi përdorur këtë metodikë të re të kirurgjisë implantare, të quajtur AMSJI, që ka i ka lejuar pacientit zgjimin nga anestezia me protezën e fiksuar tashmë."

AMSJI hap pas hapi
Për të realizuar këtë ndërhyrje, nisemi nga TAC dhe nga modeli tridimensional i nofullës për të ndërtuar më pas një strukturë të personalizuar, që do të ankorohet në nofull me vida osteosinteze. Struktura realizohet në titan duke përdorur teknika inxhinierike dhe simulohen forcat mastikatore për 15 vjet. Cilësia e strukturave që duhen implantuar është kontrolluar dhe certifikuar.

AMSJI është përbërë nga dy krahë që fiksohen me vida osteosinteze në pjesë të qëndrueshme të kafkës, pra që i nënshtrohen riasorbimit të dobët kockor. Te krahët fiksohet më pas një shufër titani dhe në të fiksohet proteza e parë provizore në të njëjtën ditë të ndërhyrjes. Pas rreth 2 muajsh mund të zëvendësohet proteza provizore me atë definitive.

Proteza personalizohet plotësisht sipas pacientit, optimizohet për t'u përshtatur me kockën e nofullës dhe krijohet vetëm për të. Në fakt kjo paraqet një ndryshim në drejtim sepse nuk është më kocka e pacientit që duhet të përshtatet me implantet por është vetë implanti që krijohet ad hoc për pacientin. Teknika kirurgjikale për të vendosur AMSJI konsiston në ngritjen e kockës së nofullës, në gjetjen e pozicionit të duhur të strukturës dhe në fiksimin e vidave nga osteosinteza.

Pacienti hyn në sallën operative pa dhëmbë dhe del me harkadën dentare fikse, të cilën do e mbajë për 2 muaj dhe më pas do e zëvendësojë me atë definitive, më të përpunuar, ku përveç të tjerave mund të optimizohen ngjyrat dhe format e dhëmbëve për të kërkuar estetikën më të mirë.

Në foton më poshtë tregohet simulimi i punimit: