Përgatitja e pjesës implantare, kini kujdes me "mbinxehjen"

Lidhja ndërmjet kohëzgjatjes së frezimit dhe rritjes së temperaturës kockore të kreshtës

Nga Lara Figini

Një nga faktorët e shumtë që mund të dëmtojë osteointegrimin në implantologji është rritja e tepërt e temperaturës së gjeneruar gjatë fazave të përgatitjes në pjesën implantare: kalimi i 47°C mund të shkaktojë në mënyrë irreversibile nekrozë kockore.

Kohëzgjatja e përgatitjes së pjesës implantare, duke kërkuar domosdoshmërisht një kohë më të madhe të frezimit të kockës, mund të lidhet me një rritje të pashmangshme të temperaturës kockore në fazën përgatitore, por këtë aspekt e kanë hetuar shumë pak studime në literaturë.

Tipologjia e kërkimit dhe mënyra e analizës
Në një studim in vitro në laborator, të publikuar në Implant Dentistry në shkurt/prill 2018 janë krahasuar temperaturat e kockës së kreshtës gjatë përgatitjes së pjesës implantare për kohëzgjatje të ndryshme të osteotomive dhe sistemeve të ndryshme implantare. Autorët kanë përdorur brinjë viçi për të simuluar kockën kortikale mandibulare të njeriut.

Tre sisteme implantare janë testuar: AstraTech, Akylos dhe XiVE. Tre gjatësi osteotomie janë hetuar (8, 12 dhe 16 mm) dhe janë kryer dy faza perforimesh. Janë grumbulluar dhe janë regjistruar të dhënat rreth forcës së frezimit, shpejtësisë së frezimit, kohëzgjatjes së frezimit dhe temperaturës së arritur.

Rezultate
Janë observuar diferencat rreth temperaturës maksimale të kockës së kreshtës gjatë perforimit të parë për kohëzgjatje të ndryshme të osteotomisë dhe për të gjitha sistemet implantare. Një rezultat i ngjashëm është arritur edhe për perforimin e dytë. Frezime më të shkurtra kanë prodhuar më pak nxehtësi në kockë për shkak të një fërkimi më të vogël dhe kohës së reduktuar të kontaktit frezë-kockë.

Konkluzione
Nga të dhënat e studimit mund të dalim në konkluzionin që gjatësia e frezimit të kockës në fazë përgatitore të pjesës implantare kontribuon në një rritje të temperaturës intrakockore pavarësisht nga sistemi implantar i përdorur. Freza dhe osteotomi më të gjata kanë shkaktuar temperatura më të larta të kockës së kreshtës.

Diferenca maksimale e temperaturës së regjistruar ndërmjet gjatësisë së osteotomisë më të shkurtër dhe asaj më të gjatë ka rezultuar të jetë nën 1°C. Temperatura më e lartë se 47°C, që mund të shkaktojë nekrozë kockore, nuk është regjistruar në asnjë rast. Sistemi XiVE ka treguar funksionalitetin më të mirë.

Implikime klinike
Me të gjitha limitet e këtij studimi dhe nevojën për punime të tjera krahasuese, implantologu mund të marrë në konsideratë sistemet e implantit të testuara dhe që nuk kanë risk për të provokuar mbinxehje të kockës që mund të çojë në nekrozë.

Për më tepër:
Katic Z, Jukic T, Stubljar D. Effects of osteotomy lengths on the temperature rise of the crestal bone during implant site preparation. Implant Dent 2018;27(2):213-20.

Përktheu: Valbona Spahia