Duhani ndikon (negativisht) në efikasitetin e terapisë periodontale jokirurgjikale

Ekspertët e SIdP: motivimi i lënies së duhanit duhet të jetë pjesë integruese e terapisë

Sipas një studimi të paraqitur në EuroPerio9, i cili është Kongresi kryesor botëror i Periodontologjisë dhe implantologjisë, duhani ka një impakt negativ në shëndetin periodontal në fund të terapisë periodontale jokirurgjikale. Periodontiti i shkaktuar nga pllaka bakteriale godet indet mbështetëse të dhëmbëve, duke shkaktuar riabsorbim të kockës përreth dhe duke lënë hapësira ndërmjet dhëmbëve dhe gingivave të quajtura zakonisht "xhepa gingivalë".

Terapia e vënë në zbatim nga periodontologët, përbëhet kryesisht nga heqja e pllakës dhe e tartarit të pranishëm në xhepa nën gingivë. Kjo kurë e parë mund të reduktojë në mënyrë të konsiderueshme thellësinë e xhepave më të mëdhenj se 4 mm qoftë te duhanpirësit qoftë te joduhanpirësit.
Një kërkim i fundit i paraqitur në Amsterdam nga një grup studiuesisht suedezë nënvizon që "reduktimi i thellësisë së xhepave është në mënyrë të ndjeshme më i madh te joduhanpirësit një vit pas trajtimit". Xhepat periodontalë fomohen ndërmjet gingivës dhe rrënjës së dhëmbit, ku bakteret mund të përqendrohen dhe të lëshojnë toksina që ndërveprojnë me sistemin imunitar të individit duke çuar në humbjen e aparatit mbështetës të dhëmbit. Në 1551 pacientë të trajtuar nga viti 1980 deri në 2015 pas fazës aktive të higjienës profesionale ka pasur një reduktim të konsiderueshëm të parametrave klinikë periodontalë qoftë te duhanpirësit qoftë te joduhanpirësit. Por ndërkohë që te joduhanpirësit reduktimi është 72%, te duhanpirësit mbetej 51% duke evidentuar sesi duhani ndikon negativisht në shërimin e indeve periodontale pas instrumentimit jokirurgjikal.

Por nuk ishte vetëm kjo pasi kërkuesit kanë zbuluar edhe që sasia e pllakës zvogëlohej mesatarisht 69% te joduhanpirësit dhe vetëm 53% te duhanpirësit, gjithmonë pas një viti nga terapia.
"Ky studim", - nënvizon dr. Luca Landi, president i zgjedhur i Shoqërisë Italiane të Periodontologjisë dhe Implantologjisë, - "është një konfirmim i fundit që shëndeti periodontologjik ndikohet negativisht nga pirja e duhanit. Është vënë re prej kohësh sesi duhani shumëfishon dëmin e shkaktuar nga infeksioni bakterial, por sot e dimë që edhe terapitë nuk arrijnë të jenë plotësisht efikase te pacientët duhanpirës. Kjo e dhënë na kujton sesa e rëndësishme është nevoja për të parandaluar ose për të hequr dorë nga vesi dhe sesi kjo temë duhet të jetë pjesë integruese e çdo kure".

Përktheu: Valbona Spahia