Rehabilitimi protetik "metal-free" në katër implante

Përdorimi i një procedure minimalisht invazive, kërkimi italian i publikuar jashtë vendit

Prof. Andrea Cicconetti

Rehabilitimi i harkadave edentule është një argument me interes të madh në praktikën klinike stomatologjike. Nevoja e kësaj lloj procedure mund të derivojë nga gjendje të ndryshme: zëvendësim i një proteze të lëvizshme e kërkuar për arsye funksionale, komforti dhe estetike; humbja traumatike e elementeve dentare; patologji periodontale; pacientët me atrofi të nofullave.

Aktualisht janë përshkruar teknika të ndryshme nga autorë të ndryshëm me prova shkencore jo gjithmonë të qarta. Metodat e ndryshme bazohen në koncepte ndonjëherë të ndryshme në qasjen terapeutike në kohët dhe në materialet e përdorura. Procedura në testim në këtë artikull ka këtë objektiv: rehabilitim fiks afatgjatë të harkadës inferiore në një mënyrë minimalisht invazive.

Për këtë qëllim përdoren si suport vetëm katër implante ultra-short (gjatësi <6mm) me diametër prej 4mm dhe gjatësi prej 5mm (Bicon), të pozicionuar në njësinë kanine dhe atë të molarit të parë në çdo anë. Implantet më pas rehabilitohen me një protezë të realizuar në strukturë kompozite të forcuar me fibra (Trinia, Bicon) mbi të cilën janë montuar dhëmbë të punuar më parë në kompozitë.

Implantet dhe protezat janë projektuar për të shpërndarë në mënyrë biometrike dhe fiziologjike streset që lidhen me ngarkesën. Në këtë mënyrë në indin perimplantar krijohet dhe mbahet një kockë e llojit Haversian, vitale dhe reaguese, në gjendje që t'i përgjigjet stimujve funksionalë.

Një kusht i tillë është i domosdoshëm për suksesin afatgjatë që përbën objektivin primar të një rehabilitimi të tillë. Gjithashtu, analizohen dhe aspektet që lidhen me procedurën: përdorimi i numrit minimal të implanteve; pajisjeve fiksuese të futura drejtpërdrejt në indin kockor të lindur pa nevojën e procedurave të graftit ose rigjenerimit; si edhe karakteristikat e strukturës protetike që mundësojnë modifikimin dhe riparimin në kohë. Këto aspekte mund të bëjnë një rehabilitim potencialisht kompleks dhe të kushtueshëm në një procedurë rutinë.

Karakteristikat e implanteve dhe të materialeve protetike mundësojnë që të kryhen shtrirje distale deri në 21 mm të suportuara nga implante me dimensione të reduktuara. Karakteristika të tilla bioinxhinierike bëjnë të mundur rehabilitimet e harkadave atrofike në mënyrë shumë konservative.

Për më tepër:
Passaretti A, Giulia Petroni G, Miracolo G, Savoia V, Perpetuini A, Cicconetti A. J Prosthodont Res 2018 Apr;62(2):264-7.

Përktheu: Erjola Taga