Përdorimi i fillit interdentar, kush e përdor dhe kur

Një studim amerikan ka analizuar përdoruesin tipik

Nga Figini Lara

Pllaka dentare është një faktor etiologjik në zhvillimin e sëmundjes periodontale kronike dhe heqja ditore e saj çon në një reduktim si të prevalencës ashtu dhe të ashpërsisë së inflamacionit gingival.

Furça nuk arrin të heqë plotësisht pllakën nga sipërfaqet proksimale prandaj, përdorimi i saj duhet kombinuar rregullisht me atë të fillit interdentar që sipas studimeve të ndryshme të literaturës heq deri në 80% të pllakës interdentare duke përcaktuar një incidencë të mëtejshme të reduktuar të kariesit dhe të sëmundjes periodontale.

Por, kur përdoret filli interdentar nga pacientët?

Tipologjia e kërkimit dhe mënyra e analizimit
Në një studim të publikuar në Journal of Parodontology, prill 2018, vlerësohet prevalenca e përdorimit ditor të fillit interdentar te të rriturit nga 30 vjeç e lart, në Shtetet e Bashkuara, në lidhje me faktorët demografikë dhe të riskut për shëndetin periodontal përfshirë konsumin e duhanit dhe në prani të diabetit të diagnostikuar. Autorët kanë analizuar të dhënat e National Health and Nutrition Examination Survey nga viti 2011 në 2014 të 8356 adultëve.

Është vlerësuar prevalenca e përdorimit ditor të fillit interdentar. Analiza e regresionit logjistik ka ekzaminuar lidhjen midis përdorimit të fillit interdentar të përditshëm dhe faktorëve demografikë dhe të riskut për sëmundjet periodontale.

Rezultate
Nga rezultatet e këtij studimi është zbuluar se 31,6% (SE = 0,8) e adultëve mbi 30 vjeç referon se përdor fillin interdentar çdo ditë, 36,6% (SE = 0,9) e adultëve referon se e përdor fillin interdentar 1 - 6 herë në javë dhe 31,9% (SE = 0,9) e adultëve referon se nuk e përdor fare fillin interdentar.

Gjithashtu janë evidentuar diferenca domethënëse sipas moshës, seksit, racës, origjinës hispanike, gjendjes sociale, formimit, përdorimit të duhanit dhe pranisë së diabetit. Është vërejtur se duhanpirësit (OR 0,82, IC 95% 0,68, 0,99) e përdorin më pak fillin interdentar ditor në krahasim me jo duhanpirësit. Në fakt nuk është hasur asnjë ndryshim domethënës midis të rriturve me ose pa diabet (OR 0,75, IC 95% 0,52, 1,08).

Konkluzione
Përafërsisht, rreth një e treta e adultëve amerikanë referon se e përdor fillin interdentar çdo ditë. Femrat, individët me të ardhurat më të larta dhe adultët jo hispanikë aziatikë dhe hispanikë kanë treguar se e përdorin më me ngulm fillin, ndërsa përdorimi më i ulët i tij është zbuluar se është te duhanpirësit.

Implikimet klinike
Rezultatet e këtij studimi janë të kufizuara pasi janë fryt i një pyetësori me vetë raportim dhe hetojnë përdorimin e fillit interdentar vetëm në javën e fundit, e cila mund të mos reflektojë skema afatgjata. Janë të nevojshme studime të mëtejshme për të kuptuar më mirë përdorimin e fillit interdentar të përditshëm për periudha më të gjata kohe dhe për të vlerësuar faktorë të tjerë risku që kontribuojnë në sëmundjen periodontale, si dieta dhe gjenetika.

Për më tepër:
Fleming EB, Nguyen D, Afful J, Carrol L MD, Woods PD. Prevalence of daily flossing among adults by selected risk factors for periodontal disease - United States, 2011-2014. J Periodontol. 2018 Apr 12.

Përktheu: Erjola Taga