Reduktimi i dhimbjes post-endodontike në pacientët me pulpit simptomatik

Studime të ndryshme referojnë se tek individët me dhimbje të fortë pre-operative verifikohet përgjithësisht një dhimbje post-endodoncisë më e fortë në krahasim me ata me dhimbje pre-operative të lehtë ose pa dhimbje fare (Glennon, 2004). Nga të dhënat e kërkimit jo shumë të vonë, 65% e pacientëve me dhimbje pre-operative zhvillonte dhimbje post-operative, ndërsa vetëm 23% e atyre pa dhimbje pre-operative shfaqte dhimbje post-operative (Genet, 1986).

Një nga qëllimet kryesore të trajtimit kanalar është ai i eliminimit të dhimbjes me origjinë endodontike. Megjithatë, jo gjithmonë pas përfundimit të terapisë endodontike zhduket dhimbja, madje zgjat aq shumë sa që në ditët në vijim pas terapisë raportohet në literaturë nga 25 në 40% të pacientëve (Nixdorf, 2010).

A gjejnë konfirmim këto të dhëna dhe te studimet e kohëve të fundit? Si mund të shmangim apo reduktojmë dhimbjen post-operative te pacientët që paraqiten me pulpit simptomatik?

Administrimi i kortikosteroidëve para fillimit të terapisë endodontike mund të jetë një truk i dobishëm. Nëse një dozë e vetme parandaluese e kortikosteroidëve është në gjendje që të influencojë zvogëlimin e dhimbjes post-operative, jo vetëm do të reduktojë një bezdisje të tillë por edhe konsumin e përsëritur të analgjezikëve. Pra ky trajtim mund të përfaqësojë një mënyrë efikase për të lehtësuar dhimbjen me efekte anësore minimale.

Tipologjia e kërkimit dhe modaliteti i analizës

Në një rishikim sistematik të publikuar në Journal of Endodontics, hetohet efekti i administrimit pre-operator për dhimbjen post-endodontike në pacientë me pulpit simptomatik që i nënshtrohen trajtimit kanalar në një vizitë të vetme. Kërkimet bibliografike janë kryer duke përdorur data bazën Pubmed/Medline, Scopus dhe Cochrane për të identifikuar artikujt e publikuar mbi argumentin duke përdorur një search strategy të parastabilizuar me fjalë kyçe. Është kryer dhe një kërkim manual në sitin Clinicaltrials.gov.

Dy kërkues të pavarur kanë vlerësuar pranueshmërinë e artikujve për t'i përfshirë, kanë ekstraktuar të dhënat dhe kanë vlerësuar cilësinë. Aty ku aplikohej është kryer një meta-analizë.

Rezultate

Kërkimi nëpërmjet data bazës ka identifikuar 481 studime dhe 37 studime janë zbuluar me kërkim manual. Pasi është ekzaminuar abstrakti, vetëm 5 artikuj kanë plotësuar kriteret e përfshirjes. Analiza cilësore ka vlerësuar 4 studime me risk of bias të moderuar ose të paqartë dhe 1 studim me risk të ulët të bias.

Meta-analiza ka dëshmuar se prednisoloni i administruar para ndërhyrjes ishte në gjendje të reduktonte incidencën e dhimbjes post-operative pas 6, 12 dhe 24 orëve. Pacientët në studime kanë raportuar efekte anësore negative.

Konkluzione

Në bazë të të dhënave të këtij rishikimi, kortikosteroidet mund të jenë efikasë për lehtësimin e dhimbjes endodontike post-operative te pacientët me pulpit simptomatik që i janë nënshtruar trajtimit kanalar në një seancë. Megjithatë është e nevojshme që të kryejmë studime të mëtejshme me kampione të dimensioneve më të mëdha për të vërtetuar konkluzione të tilla.

Implikimet klinike

Kur mjekut i duhet që të trajtojë elemente dentare me pulpit simptomatik në një seancë të vetme për të reduktuar dhimbjen post-operative duke garantuar një lehtësim më të madh për pacientin që tashmë vuan, mund të marrë në konsideratë që të administrojë një dozë të vetme të kortikosteroideve si prednisolone dhe dexametasone pak para se të fillojë trajtimin endodontik.

Për më shumë informacion:

Suneelkumar C, Subha A, Gogala D. Effect of preoperative corticosteroids in patients with symptomatic pulpitis on postoperative pain after single-visit root canal treatment: A systematic review and meta-analysis.