Aftet: tre gjërat që nuk dini

Aftet janë një shqetësim mjaft i zakonshëm të cilat sjellin bezdi dhe siklet te pacienti, veçanërisht gjatë përtypjes. Por, çfarë duhet te keni parasysh kur ky problem lind?

Çfarë janë aftet?

Aftet janë ulçera të dhimbshme të mukozës së gojës, shumë të zakonshme në sipërfaqen e brendshme të faqeve dhe buzëve. Madhësitë ndryshojnë, edhe origjina e tyre gjithashtu, e cila vazhdon të mbetet një objekt polemikash edhe sot.

Në fakt, shkaqet specifike nuk dihen, te fëmijët e vegjël, aftet shfaqen gjatë periudhës së daljes së dhëmbëve ose si shoqëruese të sëmundjeve infektive. Ato zakonisht shoqërojnë sëmundjet gastrointestinale, që shkaktohen kryesisht nga stresi ose mungesa e vitaminave. Aftet pothuajse gjithmonë regresohen spontanisht brenda 10 ditëve, por mund të ndodhin edhe relapsa.

Fillimisht ato shfaqen si një njollë e vogël e kuqe brenda gojës që kthehet në një vezikulë të veshur me një cipë të hollë të bardhë. Kur blisteri shpërthen, krijohet një ulçer e vogël e cila tenton të infektohet dhe të inflamohet.

Të ushqyerit dhe aftet

Aftet mund të jenë shumë të dhimbshme dhe irritohen lehtë gjatë përtypjes ose konsumit të ushqimeve acidike. Shmangni ushqimet irrituese, të tilla si agrumet, sheqeri, çokollata dhe kafeja, ose ushqimet shumë të nxehta që mund të përkeqësojnë aftet dhe të shkaktojnë dhimbje. Ushqimi gjithashtu duhet të jetë mjaft i butë për të mos kërkuar shumë përtypje, dhe nëse gjuha ose buzët janë veçanërisht të ndjeshme, mund te konsumoni ushqime te lëngshme nëpërmjet një pipe. Shkrirja e kubeve të akullit në gojën tuaj gjithashtu mund të ndihmojë në lehtësimin e dhimbjeve që shkaktojnë aftet.

Si kurohen aftet

Fatkeqësisht, nuk ka terapi specifike për t'i kuruar ato. Sidoqoftë, është e mundur të ndërhyhet për të zvogëluar dhimbjen me anti-inflamatorë, qetësues dhimbjesh, shpëlarës goje me tretësira që përmbajnë anestetikë lokalë ose kremra dhe xhel me bazë kortikosteroidesh. Shpëlarja e vazhdueshme e gojës me tretësira të peroksidit të oksigjenit ose antibiotikë mund të shmangë infeksionet dhe komplikimet.

Shpëlarësit e gojës me bazë antibiotike janë gjithashtu shumë të dobishëm, mjeku ose dentisti mund t'i përshkruajë për të trajtuar plagët e përsëritura që shkaktohen nga aftet dhe të përdoren që në shfaqjen e simptomave të para.

Një përzierje uji dhe sode buke gjithashtu zvogëlon aciditetin e gojës dhe promovon shërimin e lezioneve të inflamuar. Ju mund të përdorni lëng Aloe vera ose fasha të lagura me çaj të zi për të lehtësuar dhimbjen, për të zvogëluar inflamacionin dhe për të qetësuar ulçerat. Tabletat e propolisit gjithashtu mund të përdoren për të parandaluar infeksionet dhe për të përshpejtuar shërimin e plagëve.